أنا مش فاهم إيه اللي بيحصل ده! ... مهما فهمت في الناس ماحدش عايز يفهم! ... مهما قلت ولا حد في دماغه! ... حاجة غريبة!... ماهو يا إما الناس مابقتش بتفهم ... يا إما أنا بأتكلم هندي!!!!
كان متنرفز و هو بيقوللي الكلام ده ... أول مرة أشوفه كدة! .. دايما كان مليان حماس و عمال بيقول إنه هيعمل و هيعمل و أكيد في يوم هيغير!
لكن إني أفهم هيعمل إيه وللا حتى هيغير إيه؛ عمرها ماحصلت!!
ما أنا مش فاهم إزاي هوه مش مقتنع بإللي بيحصل؟ .. ما كل حاجة تمام التمام أهية .. ما يروح يشوف جرانا اللي بيتخانقوا يوم ورا يوم!
المصيبة إن فيه واحد غريب عمال يلطش فيهم و في أهلهم و سايبينه و عمالين يتخانقوا مع بعض !! ... أكيد مش هتصدقوا لما أقلكم إنهم إخوات!! وللا ماتصدقوش ليه!! كل حاجة بقت ممكن تحصل اليومين دول ...
أنا مش عارف الناس اللي مش مقدرين النعمة اللي همة فيها دول ... ده انتم عندكم بيت .. وأبوكم مظبت الأغراب و باعدهم عننا!! آخر جمال و حلاوة ... ما تحمدوا ربنا بقى ...
الغريب في الموضوع إن كل ما أقوله حاجة ألاقيه عمال يحللها و يفلسفها و يطلع منها حاجات غريبة !! إني أفهم منها حاجة ؛ لا يمكن!!
بس اللي نقطني بقى إنه قال إيه عايز يغير أبوه!!! ... معقولة !! هوة فيه حد ممكن يغير أبوه؟!!
أفهم فيه .. يا ابني ده أبوك .. هوه اللي حاميك و بيأكلك و بيشربك و بيظبتك ... مش عشان ضربك مرة تقول إنك عايز تغيره !!!
وبعدين ماينفعش تغيره أصلا !!
يعد يبرطم بكلام ولا بأفهم فيه حاجة! ...
أنا أصلا أصلا بدأت أشك فيه من ساعة ما بدأ يتفلسف .. و بعدين صاحبنا إياه قاللي المرة اللي فاتت إن صاحبنا جراله حاجات غريبة ...
يا جماعة ما أنا قررت المرة اللي فاتت إني أمشي جنب الحيط ! ... مش عارف ليه بيرجع يتكلم معايا تاني و يحاول يقنعني ... و صاحبنا إياه دايما متابعني و أنا ماينفعش أزعله!!!
وكده كده أنا مش فاهم الكلام الي بيقوله ده ... قال إيه عايز يغير أبوه!! ... أنا أصلا مش فاهم الكلام اللي أنا بقوله!!
طب حد فاهم حاجة؟ .. وللا أنا بأتكلم هندي؟!!
