ساعة ساعتين ... عمال يتكلم معايا و يقنع فيا و أنا آوح فيه ... إني أقتنع لا يمكن ... لغاية ما قالي "إيه يا ابني هوه أنا بأتكلم هندي؟!"
استنوا .. هأحكلكوا اللي حصل ...
آآآي ... إيه ده؟! ... هوه إيه اللي بيحصل؟!
قالي: شكلك ماعرفتش اللي حصل ليه؟! آه .. ماهو مش مفروض تعرف!!
قلتله: إيه اللي حصل؟ ...
قاللي: مش إنت مافهمتش؟! هوه ده المهم!!
بس ده قالي كلام كبير قوي ... أو ... مش عارف .. هوه شكله كبير!! ... الصراحة أنا مش فاهم ... لكن أنا عايز أفهم!
آي ... إيه يا عم فيه إيه؟!!
قاللي: إنت عايز تفهم؟!!!! ... إنت مش فاهم إنت بتعمل إيه ...
قلتله: بأعمل إيه؟! هوه إنت مين أصلا؟! ... آي .. إيه يا عم مالك ومال قفايا ...
قاللي: شكلك مش ناوي تجيبها لبر ... بيقولك "إمشي جنب الحيط" ...
أنا مش فاهم ... الكلمة ده سمعتها كتير قوي من مليون واحد ... يعني إيه أمشي جنب الحيط ؟! ... و بعدين إيه اللي هيحصل لو مشيت بعيد عنها شوية؟! ... أيوه .. أنا فاكر إنه قاللي حاجة عن الموضوع ده ... ثواني كدة أفتكر ... آآآآآآآآي ....
قاللي: مممم ... هتنسى وللا ننسيك؟!
قلتله: نفسي أفهم بس مالك ومال قفايا ... بس أقول إيه ... أهو قفايا أحسن ما تضربني في حتة تانية ... أهو اللي نعرفه أحسن من اللي مانعرفوش ...
قاللي: برافوا عليييييييييييك .... إنت كده شطور و هتخليني أحبك ... أوعدك إنك هتشوف حاجات حلوة كتيييييييييير ....
قلتله: يااااااااه ... فعلا ... طب ماشي .. أنا من زمان بأقول إنك جااامد جدا ... كفايا دماغك يا راجل ... أنا بس عندي سؤال !!!!
قاللي: و بعدييييييييين !! .. كدة هتزعلني منك ... شايف الحيط؟ ظلك مايبعدش عنه ... هتزعلني مش هأضربك على قفاك!!!
قلتله: لااااااااااا ... اللي نعرفه أحسن من اللي مانعرفوش ... قفايا و مستحمل و راضي ... مين يضمن أي حاجة تانية!!
قاللي: برافوا عليك ... كدة إنت حبيبي و كفائة ... سلام يا شقيقي !!
هوه ده مين أصلا؟! أكيد حد مهم!! ....
حد فاهم حاجة؟ ... وللا أنا بأتكلم هندي؟!
la2 akeed betetkalem Hindi
ردحذف